Stories of inspiration

Kapag May Balak, Hayaang Mamulaklak

Ang Kwento ng mga Kababaihan ng LAWPA

By: Noah I. Portuguez

Sa isang bayan sa Camarines Sur, may isang grupo ng mga kababaihan na mahilig sumama sa iba’t ibang pagtitipon. Maging kasalan, birthday, o anumang okasyon ay hindi nawawala ang grupong ito. Isang araw, sa gitna ng kanilang masayang salu-salo, umusbong ang ideya na bumuo ng opisyal na grupo. Hangad nilang makatulong sa kanilang komunidad.

 

Sila ang LAKASAN—pangalan pa lang, sumasagisag na sa tibay at katatagan. Nagmula sa pangalan ng apat na barangay sa Ocampo, Camarines Sur: Lapurisima, Kagmanaba, San Antonio, at Sta. Isabel. Kalaunan ay tinawag itong Lapurisima Women’s Planter Association o LAWPA. Binuo ang samahan sa pangunguna nina Josi Hernandez, Rosita Ibarientos, Yolanda Riba, Anabel Iluha, at Rosana Marpuri.

Layunin ng LAWPA na tutukan ang pangangailangan ng kanilang pamayanan sa pamamagitan ng pakikilahok sa komunidad gamit ang kanilang lokal na kaalaman.

 

Sinimulan nila ang pagtatayo ng communal garden. Pinalalago nila ito upang magkaroon ang kanilang komunidad ng sariling pook-taniman ng gulay. 

Ang kanilang mga ani ay inaalok sa public market ng Munisipyo ng Ocampo, habang ang ibang nalilikom nilang kita ay kanilang ibinabahagi sa Bicol Medical Center Hospital ng Naga City.

 

Bukod pa rito ay sinusuportahan din nila ang mga senior citizen sa pamamagitan ng pagbibigay ng libreng gamot at grocery pack mula sa mga donasyon.

 

Handa rin silang magbigay ng tulong pinansiyal sa mga namatayan sa oras ng pangangailangan. Gayundin sa mga miyembro o interesado sa kanilang loan assistance sa “Project Tabang”.

 

Sa determinasyon at pagtutulungan ng LAWPA, patuloy silang nagbibigay ng inspirasyon sa kanilang komunidad.

 

Ngunit sa kabila ng kanilang mga adhikain, humaharap din ang grupo sa ilang mga pagsubok tulad ng kakulangan sa mga miyembro, kagamitan, at makinarya. Gayunpaman, hindi nila pinalagpas ang oportunidad na matuto para sa kanilang pag-unlad.

 

Kasama ang LAWPA sa mga nagsasanay ng Integrated Farming Bio System (IFBS) sa Shell Training Farm sa Bombon, Camarines Sur. Ito ay programa ng Pilipinas Shell Foundation, Inc. (PSFI) na nagsasagawa ng mga training tungkol sa sustainable practices sa agrikultura. Mabuting hakbang ito para sa pagpapalago ng kaalaman, kakayahan, at produktibidad ng mga magsasaka.

 

Dahil dito ay umangat ang kalidad at dami ng kanilang ani. Malaki ang naitulong nito sa pagyabong ng kanilang community garden.

Bukod pa rito, suportado rin ng PSFI ang kanilang Swine Breeding and Dispersal Project. Ang proyekto ng LAWPA ay nagbibigay ng karagdagang pangkabuhayan para sa kanilang komunidad.

 

Ang LAWPA—noo’y nagsimula lamang bilang isang balak sa isang kasiyahan, at ngayo’y

namulaklak ng kolektibong aksyon— ay isang magandang halimbawa ng kung paano ang pagkakaroon ng malasakit sa isa’t isa ang ating makakapitan upang harapin ang mga hamon ng lipunan.

 

Iyan ang lakas ng kababaihan.

Related stories:

Pagsusumikap ng Isang Ama

Ngayong Fathers’ Day, ating ipinagdiriwang ang mga ama at mga tumatayong ama na nagsusumikap mapabuti ang buhay ng kanilang mga pamilya.

Tulad ni Rene Luarez, isang Gas Mo Bukas Ko (GMBK) scholar, marami sa kanila ang sinasamantala ang mga oportunidad ng Technical and Vocational Education and Training (TVET) upang makakuha ng mas mataas na antas ng kasanayan sa kanilang napiling larangan. Hindi lamang pinapaganda ng TVET ang mga karera, pinapalakas din nito ang mga komunidad at ekonomiya.

Basahin ang kwento ni Rene at kung paano niya binago ang kanyang buhay at ang kinabukasan ng kanyang pamilya sa pamamagitan ng pagsusumikap at mga oportunidad na hatid ng mga pagsasanay mula sa Shell at PSFI.

Sama-samang Pagsulong ng mga Magsasaka ng El Nido

Binibigyang halaga ng PSFI ang organikong pagsasaka dahil nakabubuti ito sa kalikasan at sa kalusugan ng parehong mamimili at magsasaka. Dahil dito, inilunsad ang programang Shell Training Farm (STF) para sa mga magsasakang nais matutunan ang organikong agrikultura at pagnenegosyo nito.

Kabilang si Sylvina Rodriguez sa mga kalahok ng STF sa El Nido, Palawan. Pinili niya ang paggamit ng organikong pamamaraan sa pagsasaka para makatulong sa pag-angat ng kalidad ng produkto ng kanilang kooperatiba. Sa gayon, makikilala ang magandang ani mula sa mga magsasaka ng El Nido.

Higit sa mga Hadlang

Higit sa mga hadlang– ‘yan ang pinatunayan ni Nerma Abayon o mas kilala bilang Sining, isa sa mga boluntaryo ng Movement Against Malaria (MAM) ng Pilipinas Shell Foundation, Inc. (PSFI).

Sa puso niyang nakikibaka, hindi balakid ang pagkaputol ng paa upang ipagpatuloy ang kanyang adbokasiya at pagsisilbi sa kapwa.

Paano mahigitan ang ating mga hadlang? Basahin:

Ang Tamis ng Tagumpay!

Matamis ang lasa ng tagumpay para kay Jona, isang caddy, na nagawang iangat ang simpleng hilig at pagkatuto sa pagbe-bake tungo sa isang umuunlad na negosyo ng cake.