Masasabi na agrikultura ang pinakamahalagang sektor ng ating ekonomiya sapagkat binubuhay nito ang milyun-milyong Pilipino. Ayon sa datos ng United Nations World Food Programme (WFP), humigit kumulang sampung milyon ang naghahanap-buhay bilang magsasaka habang umaasa ang mahigit 100 milyong katao sa kanilang mga produkto. Sa kabila nito, kulang ang pagbibigay ng pansin sa mga suliraning kinakaharap ng sektor ng agrikultura. Habang dumarami ang populasyon, nananatiling maliit ang kita, kulang ang kapital, at nahuhuli ang teknolohiya ng maraming magsasaka.
Itinaguyod ng Pilipinas Shell Foundation ang Shell Training Farms (STFs) sa iba’t ibang probinsya upang makatulong sa mga magsasaka at matugunan ang kanilang mga pangangailangan. Isa si Sylvina Rodriguez sa mga magsasakang kasapi ng Asosasyon ng Mga Magsasaka at Mangingisda sa Munisipyo ng El Nido (AMMMENI), na mahigit tatlong taon nang kasangga ng PSFI sa pagpapaunlad ng agrikultura sa El Nido.
Nagsimulang magsaka at magtanim ng gulay si Sylvina noong 2020. Ginawa niya ito upang suportahan ang pang araw-araw na pangangailangan ng kanyang pamilya na binubuo ng kanyang asawa’t apat na anak. Sumali si Sylvina sa STF para mapalawak ang kaniyang kaalaman sa organikong pagsasaka, o ang paraan ng pagsasaka na nagbubunga ng masaganang ani at hindi mapaminsala sa kalikasan. Ninais rin niyang ibahagi sa mga kasama sa asosasyon ang mga natutunan niya sa mga pagsasanay ng STF nang sama-sama silang matuto at umangat.
Dumami pa ang mga programa sa El Nido na katuwang ng mga layunin ng STF, na sinalihan rin ni Sylvina. Inilunsad ang El Nido Food Terminal (ENFT) at binuo ang El Nido Agriculture Cooperative (ENAC) upang diretsong maihatid sa mga mamimili ang mga prutas at gulay na tinanim at inani mismo ng kooperatiba. Sa gayon, direktang sinusuportahan at tinatangkilik ang produkto ng mga magsasakang tulad ni Sylvina.
Sa kabila ng mga tagumpay na kanilang nakamit, mayroon pa rin na mga problemang hinaharap ang mga magsasaka ng AMMMENI. Kakulangan ng binhi, pagtaas sa presyo ng organikong pataba, at kakulangan sa materyales para sa pagpapatubig ang mga karaniwang suliranin na dinaranas ng mga magsasaka. Ngunit nananatiling matatag ang loob ni Sylvina sa kabila ng mga nito.
Bukod sa pagyaman ng kaalaman ukol sa pagsasaka, tumaas daw ang kanyang kumpyansa sa sarili mula noong sumali siya sa STF. Ayon kay Sylvina, lalo pa siyang umaasa na umangat ang buhay ng mga magsasaka sa kanilang lugar. Sama-samang nagsusumikap ang mga magsasaka ng El Nido at nariyan ang PSFI na handang tumugon sa mga pangangailangan nila. Bilang halimbawa, tinuruan sila ng organisasyon kung paano gumawa ng sariling organikong pataba para hindi na bumili nito. Inaasahan ni Sylvina na magpatuloy ang PSFI sa pagtulong sa magsasakang Pilipino.
Bilang taga-El Nido, inaasahan niya ang pag-unlad ng kanyang komunidad. Pangarap ni Sylvina na mapalago ang pagsasaka at maibahagi pa sa mas marami ang kanyang mga natutunan mula sa mga programa ng PSFI. Sa ganitong pagsisikap humuhusay ang lokal na produkto at tumataas ang kanilang kita. Bilang ina at asawa, pinapangarap niyang makapagtapos ng pag-aaral ang mga anak at magkaroon sila ng maayos na pamumuhay.
Payo ni Sylvina sa kanyang mga kapwang magsasaka na huwag ikumpara ang trabaho sa iba. Sipag at tiyaga ang kinakailangan upang makamit ang tagumpay.
Pagtangkilik sa produktong Pilipino at pagtugon sa pangangailangan ng mga manggagawa ang kailangan para sa pag-asenso ng pambansang ekonimiya. Kinikilala ng Pilipinas Shell Foundation ang halaga ng bawat magsasaka at ang ambag nito sa sektor ng agrikultura. Bukod sa tulong na idinudulot ng Shell Training Farms, tinutugunan ng PSFI ang iba’t ibang pangangailan ng mga komunidad na kinabibilangan nito.
Tuklasin ang mga program ng PSFI sa https://pilipinasshellfoundation.org/our-work-programs/.
#MasaganangAgrikultura #PilipinasShellFoundation #FilipinoForward
